गायक राजेन्द्र विष्टको थारु भाषाको गीत माकसम मै तुकिन मन परैठु सांगितक बजारमा उकालो लाग्दै छ । गायक स्वयम् कै शब्द तथा सङ्गीतमा निर्माण भएको सो गीतको म्युजिक भिडियो सार्वजनिक भए सँगै गीत चर्चामा आउन थालेको हो । लामो समय देखी निरन्तर सांगित क्षेत्रमा रहेका गायक विष्टका दर्जनौँ गीतहरू बजारमा भएता पनि थारु भाषाको गीत भने यो नै पहिलो हो । थारु समुदायका दर्शक तथा श्रोताहरूलाई मध्यनजर गर्दै सो गीत ल्याएको उनको भनाई छ । यो गीतले तपाईँको साङ्गीतिक यात्रा अझै सहज हुन्छ हैन त ? भन्ने हाम्रो प्रश्नमा उनले भने…. “चौधरी समुदायको धेरै कार्यक्रमहरूमा गइयो तर चौधरी भाषाको गीत आफू सँग नहुँदा सारै नरमाईलो लाग्थ्यो त्यसैले पनि यो गीत गरे र यो गीतले सफलता मिल्ला नमिल्ला भन्नु भन्दा पनि मैले बिल्कुलै फरक काम गरेको छु । त पहाडी, त थारु भनेर जातीयताको आधारमा समाज फुटी रहेको अवस्थामा म पहाडी समुदायको व्यक्ति भएर पनि योे थारु गीत गाएर दुवै समुदायलाई जोड्ने काम गरेको फिल गरेको छु ।

पहाडीले थारु भाषाको गीत गाउन सक्छ, थारुले दोहोरी तथा देउडा गीतहरू गाउन सक्छ र गाउँछ भने यसले एक अर्काको सांस्कृतीलाई आत्मसाथ गरेको महसुस गर्नु पर्छ भन्ने लाग्छ मलाई त । जे होस आत्म सन्तुष्ट छु, खुसी छु । मेरो कामको मूल्याङ्कन त दर्शक, श्रोता जो मेरा भगवान्, उहाहरुले गरिहाल्नु हुन्छ नि हैन र….” उनको भनाइले समाजको सकारात्मक रूपान्तरणको लागी कलाकारहरूको पनि महत्त्वपूर्ण योग्दान हुने कुरा प्रस्ट झल्किन्थ्यो । साथै उनले गीत निर्माणमा विवश चौधरीले गरेको सहयोगलाई बिर्सिएनन् । विवश यो गीतका निर्देशक हुन भने उनलाई म्युजिक भिडियोमा समेत देख्न सकिन्छ उनको साथमा विशाल र सुनिताको अभिनय पनि देख्न पाइन्छ । विवश चौधरीको निर्देशन रहेको सो गीतलाई रामु चौधरीले छायाङ्कन तथा सम्पादन गरेका छन् भने केशव बडूको एरेन्ज रहेको छ ।